Puff 泡芙

做呢個甜品係一大挑戰 - 挑戰你既臂力! 力水少啲都唔得，因為要不停打起啲空氣入去，咁焗起嚟就會脹卜卜。當你見到舊麵糰喺焗爐度隨隨發脹，心情真係好鬼興奮，我鍾意整到細細粒bite size，超可愛！餡料可以用果醬，吉士醬，雪糕仲正！不過用雪糕做餡就要快啲食，雪糕好快溶。


水 60g
牛奶 60g
無鹽牛油 60g
低筋麵粉 120g
雞蛋 2只
鹽 少許

1. 焗爐預熱200度。
2. 麵粉同鹽過篩備用。
3. 牛油，水同牛奶放煲中煮開，一見到滚就即刻放麵粉落去用木杓不停地攪，直至攪成一個麵糰。
4. 離火，繼續不停地攪2至3分鐘直到唔黐煲為止。
5. 略為冷却一陣就加入蛋，要逐只放，每放一只蛋之後要不停地攪匀，放嗮蛋之後繼續拌匀至麵糰順滑同有光澤就得啦。
6. 牛油纸舗焗盆。
7. 用唧袋或者用匙羹將麵糰分成喜愛既大小置於焗盆，麵糰之間要距離大概2吋，否則焗起嚟會發大同黐埋。
8. 焗20分鐘就攞出嚟攤凍。
9. 可以喺中間切開，搽上喜愛饀料。又或者將饀料放入唧袋，喺底部唧入去都得。

* 吉士醬可參考士多啤梨拿破侖食譜: http://wahlaikitchen.blogspot.hk/2013/04/blog-post_27.html

士多啤梨拿破侖

見到就好開心，但係食得唔安心，因為唔知點食，切開又唔係，因為一切就散，挈大個口嚟食又失儀態，諗住買番屋企吃，點知番到屋企又淋嗮，激死！
偏偏又鬼咁鍾意吃，唯有動手DIY啦!


材料:

急凍酥皮   一塊
士多啤梨/藍莓   適量
糖粉   適量


吉士醬材料:

蛋黄   3只
沙糖   50g
麵粉   20g
粟粉   20g
牛奶   300g
雲呢拿油   1茶匙
鹽   1/4茶匙



吉士醬做法:

1.  蛋黄，沙糖，鹽，麵粉同粟粉拌匀。

2.  牛奶用中火煮至煲邊起泡，離火。
3.  慢慢倒進蛋液，要不停地搞如果唔係會變咗蛋花。
4.  跟住隔篩倒番落煲度用中火邊煮邊搞至杰身。
5.  倒進碗中，加入雲呢拿油搞匀。

6.  用保鲜紙貼住吉士醬嚟包，放入雪櫃雪過夜。




焗爐預熱200度：

1.  急凍酥皮略為解凍，界開九塊。
2.  用叉喺酥皮面拮幾個窿透氣。
3.  放入焗爐焗15分鐘，放凉。
4.  吉士醬放入唧袋，士多啤梨及藍莓切好。
5.  吉士醬唧喺第一塊酥皮上，排上士多啤梨，放第二塊酥皮，唧上吉士醬及排上士多啤梨，再放上第三塊酥皮，用士多啤梨及藍莓娤飾，撒上糖粉，食得！

炒牛河

喺出面食牛河總係好肥膩，食完飲番幾杯普洱茶都唔掂，自己炒係就係冇咁有鑊氣，但就可以控制油既份量，健康小小咁啦！
小小貼士： 但凡炒河粉，米粉同麵，最好用筷子嚟炒，如果用鑊剷炒，一定會炒到啲粉麵爛嗮，除非落好多油啦，但係我地要食得健康嘛！



材料:

河粉     一斤
牛肉     半斤
銀芽     半斤
蒜頭     两粒
洋葱     1個
油     2湯匙


牛肉醃料:

生抽     2湯匙
老抽     1茶匙
糖    1湯匙
油     2湯匙
胡椒粉     半茶匙
生粉     1茶匙
酒     1茶匙


豉油汁:

生抽     2湯匙
老抽     1茶匙
蠔油     1湯匙
糖    1湯匙



1.  河粉要逐條撕開，不能偷懶。
2.  燒熱鑊，落1湯匙油，下蒜頭，洋葱，兜炒一陣拎走蒜頭，因為凈要個味。
3.  再落埋1湯匙油，放牛肉炒至差唔多熟就落河粉兜匀，跟住落豉油汁拌匀，再落埋銀芽兜匀就可以上碟啦。

Mango Tree

 星期日女人聚會要揾個地方可以坐得耐唔使比人趕，環境舒服得嚟啲嘢又要好食真頭痛！好在我冰雪聰明突然間醒起最近Elements開咗幾間新餐廳，一於試吓新嘢先！最後揀咗食泰國菜 - 純粹係情意結，因為喺曼谷曾經光顧過，有啲信心。

不過間餐廳位置比較隱蔽，港鐡站出嚟行到脚仔軟，要問實Q先知喺邊。諗住星期日食晏梗係訂定位好啲啦，點知去到靜英英，仲以為佢未開添，門口姐姐帶我地行入去，原來餐廳都幾大，一大片落地玻璃，已經有幾檯客坐咗喺度，我地都坐到window seat，好正！

呢盞樹燈好鬼搶眼!



好清新嘅荔枝Mojito - 非常泰feel!



香葉雞 - 保持番水凖


咖哩荔枝鴨 - 咖哩香濃，撈白飯一流！



最正係呢個芒果蟹肉炒飯 - 爆Like!


馬拉盞通菜 - 其實係好食不過我覺得辣，所以唔係食得好多


幾個女人由12點坐到4點幾，完全冇人干擾，亦唔會逼你再叫嘢食，服務態度非常好，不停幫我地加水 - 讚！

南乳燒雞

而家新鲜雞咁鬼貴，唔捨得用嚟燒焗 (係呀，巧cheap呀！)，所以今次用咗冰鲜雞，都唔錯吖！

冰鲜雞 一隻
鹽 1茶匙


醃料：

南乳 2塊
豉油 1茶匙
紹酒 2湯匙
糖 半茶匙
薑蓉 1茶匙

1. 雞洗淨抹乾裏裏外外，再風乾。
2. 用鹽搽匀成隻雞（裏裏外外），醃料撈匀，然後塗匀成隻雞（都係裏裏外外），放入雪櫃醃過夜。
3. 焗爐預熱200度，焗盆舖錫紙，蒸架擺中間，最好抹啲油，咁樣雞皮就唔會黐住。
4. 放隻雞上蒸架，雞胸向上，焗20分鐘，反轉再焗20分鐘至金黄色。
5. 切件上碟。



Carbonara

天氣好厭悶，唔想出街但個肚又唔爭氣喺度嘈嘈閉，點算好？週圍摷吓睇吓有乜嘢可以充饑，哈哈.....竟然比我揾到一包意粉同埋唔知幾時食剩嘅幾片煙肉，得咗！

一人前份量：

意粉     半包
煙肉     2片
淡忌亷     120g
車打芝士（磨碎）     2湯匙
橄欖油     1茶匙
蒜頭     1粒
蛋黄     1隻
鹽 / 黑椒粉     適量

1. 煲滚半煲水，落油同鹽，跟住放意粉煮7分鐘左右（包裝紙有冩），千祈唔好過冷河，會冲走嗮啲味！
2. 煙肉切幼條，放平底鑊用中慢火乾煎，落埋蒜頭煎大約15分鐘至煙肉金黄色，撈起煙肉，蒜頭唔要因為淨係想要個味。
3. 將意粉倒落煙肉油中略炒一下，跟住快手落忌亷同芝士，兜匀後熄火，拿拿臨落埋隻蛋黄，用摩打手極速撈匀，如果唔係隻蛋黄熟咗就唔靚仔架啦！
4. 上碟後撒上煙肉，鹽 / 黑椒粉 - 快靚正！

Financier

好鍾意覆盆子，比人一種高貴嘅感覺，甜品加一粒上去，即時升呢收多廿蚊！
呢個做法有啲似Madeleine，都係最好隔過夜先好拎去焗。

 



麵粉（過篩） 30g
杏仁粉 20g
糖粉 50g
鹽 1/4茶匙
無鹽牛油 50g
蛋白 3隻
雲呢拿油 半茶匙
覆盆子 適量

1. 焗爐預熱200度。
2. 杏仁粉舖喺锡紙上，焗3分鐘。
3. 焗模抹油，放入冰格。
4. 蛋白略略打至起泡。
5. 麵粉，杏仁粉，糖粉同鹽撈匀，加入溶咗嘅牛油搞匀，跟住用fold in方式加進蛋白及雲呢拿油（可放入雪櫃過夜）。
6. 麵糊注入焗模焗两分鐘左右，快手放進覆盆子，一定要快，趁未焗熟就要放，如果面頭熟咗就會擺唔到，跟住焗多5至7分鐘就得啦。

其實可以放埋覆盆子一齊焗，不過覆盆子熟咗啲汁會染紅咗個餅冇咁靚，所以我唔咁早放，都係個人喜好！

Lemon Madeleine

貝殻蛋糕仔 - 好味又Q，最好即整即食，因爲新鲜先至食到蛋糕邊係脆嘅。

 

無鹽牛油     70g
沙糖     60g
紅糖     1茶匙
蜜糖     1茶匙
檸檬皮     1個
雞蛋     2隻
麵粉     70g
泡打粉     1/4茶匙
鹽     1/4茶匙

1. 焗爐預熱175度。
2. 焗模掃上油，放入冰格。
3. 牛油溶化後同沙糖，紅糖，檸檬皮及蜜糖拌匀。
4. 輕輕搞匀雞蛋，倒入(3)。
5. 麵粉，泡打粉及鹽隔篩後用打蛋器拌入(4)搞匀。（最好放入雪櫃過夜，焗出嚟個邊更加脆）
6. 麵糊倒入雪過嘅焗模(9成滿好啦，因為佢會發起)，焗大約10分鐘，見到個邊金黄色就得啦！

點解要雪個模? 一冷一熱先可以做到脆嘅效果，明唔明呀？



Vanilla Cupcake

復活節快樂!

呢期Cupcake横行，趁吓熱鬧加入Cupcake行列，不過要多加鑽研吓擠花技巧先!

蛋糕材料：

檸檬皮     1個
麵粉     200g
發粉     1.5茶匙
鹽     1/4茶匙
無鹽牛油     115g
沙糖     110g
雞蛋     3隻
雲呢拿油     1茶匙
牛奶     60g

Buttercream:

糖粉     230g
無鹽牛油     115g
雲呢拿油     1茶匙
牛奶     2湯匙



蛋糕做法：

1. 焗爐預熱180C。
2. 檸檬皮，麵粉，發粉同鹽拌匀。
3. 用電動打蛋器將牛油及沙糖打滑，然後邊打邊加入蛋（每次一隻），最後加埋雲呢拿油。
4. 跟住將(2)分三次 / 牛奶分两次梅花間竹咁打入 - 即係落三份一(2)打匀，再落二份一牛奶打匀，如是者最後落嘅係(2)。
5. 將麵糰倒入蛋糕模，一半好啦，因為焗完會發起。
6. 焗15分鐘就得啦。

Buttercream做法：

1. 用電動打蛋器將牛油打滑，加入雲呢拿油。
2. 用低速慢慢加入糖粉。
3. 拌匀之後可以改用高速打3-4分鐘，硬度可因應喜好 - 想硬啲可以唔使落牛奶，想軟啲就可以落啲牛奶。

記住蛋糕要凍嗮先好擠花，如果唔係 buttercream會溶架啦！

牛肉炒豆角

一個好似好簡單嘅餸，其實煮起嚟都有啲學問。以前好怕炒牛肉，整過好多次都失敗，自從睇咗亞蘇教炒牛肉之後，而家就得心應手啦！

想牛肉炒起嚟嫩滑，秘訣就係千祈千祈千祈唔可以落鹽醃 - 切記，切記！





牛肉    

豆角

蒜頭

紹酒 

鹽   

醃料：

油     三湯匙

豉油     两湯匙

胡椒粉     少許

糖     一茶匙

生粉     一茶匙

酒     一茶匙

1. 豆角洗淨切段度。
2. 牛肉洗凈抹乾，逆紋切薄片，臨到煮嗰陣先用醃料醃，油嘅份量多啲都唔怕。
3. 蒜頭起鑊，兜炒一下豆角，落鹽，鑊邊灒紹酒，炒至半熟盛起備用。
4. 猛火燒熱鑊，落油下蒜頭，放牛肉舖面，唔好搞佢，等啲牛肉吸收蒜頭味，大概30秒就可以反啲牛肉，跟住落埋豆角兜炒一陣上碟。

鹹魚雞粒豆腐

突然好想食鹹魚，又發覺原來好耐都冇整過呢個餸啦，講多無謂，行動最實際！
我鍾意用梅香鹹魚，貪佢够‘淋身’易融化，啲味溶嗮喺啲汁度，令到啲雞同豆腐入嗮味，包你撈到三碗白飯！

鹹魚     一塊

雞扒     一塊
豆腐     三格
薑蓉     一茶匙


醃料：
豉油     一湯匙
胡椒粉    少許
酒     一茶匙
糖     一茶匙
麻油     一茶匙
鹽     半茶匙

1. 雞扒去皮切絲，用醃料醃一小時。
2. 鹹魚切粒，豆腐切大件。
3. 豆腐猛火煎香两面，盛起備用。
4. 原鑊用煎過豆腐嘅油爆香鹹魚，下薑蓉兜匀，放埋豆腐落去，輕手撈匀，小心唔好整爛啲豆腐，慢火炆10分鐘。



Brownies

一向對Brownies麻麻地，唔係咁鍾意佢太濕嘅感覺，呢個食譜做出嚟效果好啱我要求，唔乾但又有濕嘅感覺，正！

朱古力    100g

牛油    260g
沙糖    160g
黄糖    100g
蛋    3隻
雲呢拿油    2茶匙
麵粉    130g
可可粉    25g
鹽    半茶匙



焗爐預熱175度

1. 焗模抹上牛油。
2. 朱古力同牛油隔住熱水溶解，離火及加入沙糖同黄糖，拌溶。
3. 逐隻打入蛋，加埋雲呢拿油，放入麵粉及可可粉至全部拌匀。
4. 可放進焗過嘅胡桃，然後焗20分鐘，攪掂。

北京水餃

天氣潮濕，冇乜胃口食乜好？呢個時候就諗起包餃子，通常會包一大盤，放入冰箱，想食嗰陣就拎出嚟淥，食幾多淥幾多，方便又簡單。

水餃皮（圓形）  1斤
半肥瘦豬肉（攪碎）  1斤
椰菜  1個


豬肉醃料：
鹽  2茶匙
生抽  1湯匙
老抽  1湯匙
糖  1茶匙
生粉  1茶匙
麻油  1茶匙
薑蓉  1茶匙


椰菜醃料：
鹽  2茶匙


椰菜洗浄，放入熱水烚熟，瀝乾水份之後切碎，切碎之後再用手揸乾嗮水，一定要乾身，跟住落鹽撈匀。豬肉醃好，撈埋椰菜就可以包啦。

記住要用保鲜纸包住個盤先好放包好嘅餃子，咁樣啲餃子就唔會黐住嗮個底，同埋每隻餃子都要有空位，如果唔係啲餃子黐埋咗就會穿架啦。

無事出街少破財

整完頭髮諗住返屋企，路過Time Square對脚忍唔住走咗上去，好耐無光顧過西太后，見到呢對耳環好合眼缘，千零蚊，會員仲有八折添，OK噃，相比香奈兒啲耳環，閒閒地都三幾千蚊，連碎鑽都冇粒添！冇計啦，比强國人搶高嗮個市，唯有轉吓第二啲品牌啦，都好Like ^O^

好人當賊扮

好鬼憎行入萬X同屈XX，未行到門口就好似好熱情咁嗌住：歡迎光臨，請隨便參觀！入到去之後，成班伙記就離遠咁‘監視’住你，個個對眼好似 laser咁射住嗮，搞到自己好似個‘犯’咁！。唉.....係就係依家多咗人撻嘢，但係都唔使一竹蒿打嗮一船人架！

喧賓奪主

去Sheraton Oyster Bar 飲香檳擦海鲜，點知原來最掂都係呢個壓軸甜品 - 疏乎里！

拎到埋嚟大家都嘩然 - 估佢唔到咁鬼大個，仲要每人一個添，幾鬼擔心食唔嗮！但係賣相好得，用個好似中式碗嚟裝，陣陣蛋香味好似喺度叫: 食我啦！食我啦！

我呢個係薑汁疏乎里，有薑味之餘仲滿口薑蓉添！唔知淨係入嚟食疏乎里得唔得？

Crème Brulee

Crème Brulee - 聽到都發嗮癲，係女仔都鍾意食。簡單又易整，好多人都識整，但係好多人都怕咗枝火槍唔整 - 因爲我曾經都係！

越係驚越要面對，經驗之談。其實火槍又有乜好怕丫，只要買把靚啲嘅，貴小小都好，一定要安全！

牛奶 100g

沙糖 50g

蛋黄 4隻

全蛋 1隻

淡忌廉 400g

紅糖 55g

雲呢拿油 半茶匙

1．焗爐預熱130C

2．牛奶同沙糖攪匀，加入蛋黄同全蛋撈埋一齊。

3．落埋雲呢拿油，跟住將蛋漿過籂，然後注入焗杯。記住一定要過籂，如果唔係就唔滑架啦，此乃精髓所在。

4．焗盆要放啲熱水先好放焗杯落去，唔使太多，浸過杯底就得啦，隔水焗30分鍾。

5．攤涷之後，撒啲紅糖喺面，然後用火槍燒溶啲糖就攪掂啦！

Chocolate Framboise

好鍾意睇Laura Calder做甜品，又跟佢做咗呢個靚爆鏡嘅作品。

濃濃嘅朱古力夾着覆盆子酸酸嘅味，食起嚟唔會有太大罪惡感。

佢不單止賣相吸引，出場嗰陣仲好鬼震撼添噃！

朱古力（半甜）  330g

覆盆子汁  175g（過篩後計）

沙糖  100g

無鹽牛油（切小粒）  225g

蛋  5隻

酒（隨意）

淡忌廉  200g

原粒覆盆子  適量

1.  準備焗模: 揾隻放得入焗爐嘅兜，唔使太大，最好係又圓又深，兜入面舖錫紙。

2.  煲熱一小煲水，慢火慶住。

3.  朱古力，覆盆子汁同沙糖放入一個大過個煲嘅碗，然後將個碗放上個煲度（碗底唔好掂到水），就咁樣隔住熱水攪溶嗮佢，要用攪拌器不停咁攪,唔好比啲朱古力擎底。

4.   跟住逐粒逐粒咁放啲牛油落去，一直攪匀至牛油全部溶嗮同滑身就可以離火。

5.  將雞蛋逐隻逐隻加入，記住要不停咁攪住，如果唔係啲蛋就會熟嗮。（可以落酒）

6.  隔篩倒入焗模中，隔咗篩食起嚟先至會滑。

7.   焗爐預熱175C。焗盆放啲熱水，然後先放焗模，熱水唔使放太多，浸過焗模底1吋到就得啦，就咁樣隔水焗45分鐘到，掂嗮。

8.  出爐後攤涷，中間會有啲下陷，係正常嘅，唔使驚！涷嗮之後包上保鮮紙放入雪櫃，最好雪過夜。

9.  將雪過嘅朱古力起模 - 小心啲將個模反轉仆落隻碟度，除去錫紙。

10. 淡忌廉打起，薄薄地搽一層喺朱古力上面，好似搽漿糊咁。

11. 然後將覆盆子逐粒逐粒咁由個底開始一層層黐上去，咁就靚爆鏡啦！

香港花卉展覧2013

已經係第二年入場睇啦，舊年因為買咗部新相機，所以去影吓花，影得唔錯，所以今年繼續捧場。

有咗舊年嘅經驗，今年做足凖備工夫，十點開場就到啦，如果唔係晏咗就好多人，好難霸到靚位攞景。千祈唔好中午到，因為太陽好嗮，影出嚟啲相冇咁靚。

更多靚相

相逢恨晚

去親食潮洲粉麵，一定唔會叫牛腩 ，因為驚唔够焾，又驚佢比埋啲頭頭尾尾，食得唔過癮，所以次次都例牌食牛肚穩陣啲。

今日去食嘉麗園，突然心血來潮想食牛腩，於是就叫咗碗牛腩河走青，阿姐問要幾錢架？原來而家牛肉價格上升，連老字號都受影響，所以牛腩有两個價錢：冰鲜嘅就$32，新鲜嘅就$40，我呢啲cheap精梗係要平架啦！

原來平嘢都有好架，雖然分唔到冰鲜同新鲜嘅分别，起碼望落去個樣都够嗮靚仔先啦！老字號果然係唔同啲，牛腩炆得够焾，焾得嚟又有咬感，好後悔而家先識得食.....

Caneles

法國雞蛋仔 - 外面焦糖燶燶地，裡面軟熟同埋有蛋香味，食落有啲煙煙韌韌，唔錯嘅小食，實唔驚飽肚！

正宗做法要落啲冧酒，不過我唔Like，所以冇落。做法都好簡單，不過最好唔好即整即焗，點都要擺過夜先好拎去焗。

牛奶     250g
無鹽牛油     42g
沙糖     60g
低筋麵粉     60g
雞蛋     1隻
蛋黄     1隻
雲呢拿油     半茶匙
冧酒（隨意）


1.  牛奶同牛油放煲中煮至週邊起泡就熄火。
2.  沙糖同麵粉撈匀，落蛋，雲呢拿油同冧酒拌匀。
3.  用打蛋器邊攪住麵糊邊倒 (1) 落去，要逐少逐少落同埋要快手啲攪，如果唔係啲蛋會熟嗮。
4.  跟住拎去過篩，然後放入雪櫃雪佢一晚半晚(最少)，再倒入模。
5.  用230C焗15分鐘，跟住轉180C焗45分鐘，焗至深啡色。
6.  攤凍就吔得啦！