Carbonara

天氣好厭悶，唔想出街但個肚又唔爭氣喺度嘈嘈閉，點算好？週圍摷吓睇吓有乜嘢可以充饑，哈哈.....竟然比我揾到一包意粉同埋唔知幾時食剩嘅幾片煙肉，得咗！

一人前份量：

意粉     半包
煙肉     2片
淡忌亷     120g
車打芝士（磨碎）     2湯匙
橄欖油     1茶匙
蒜頭     1粒
蛋黄     1隻
鹽 / 黑椒粉     適量

1. 煲滚半煲水，落油同鹽，跟住放意粉煮7分鐘左右（包裝紙有冩），千祈唔好過冷河，會冲走嗮啲味！
2. 煙肉切幼條，放平底鑊用中慢火乾煎，落埋蒜頭煎大約15分鐘至煙肉金黄色，撈起煙肉，蒜頭唔要因為淨係想要個味。
3. 將意粉倒落煙肉油中略炒一下，跟住快手落忌亷同芝士，兜匀後熄火，拿拿臨落埋隻蛋黄，用摩打手極速撈匀，如果唔係隻蛋黄熟咗就唔靚仔架啦！
4. 上碟後撒上煙肉，鹽 / 黑椒粉 - 快靚正！