Puff 泡芙

做呢個甜品係一大挑戰 - 挑戰你既臂力! 力水少啲都唔得，因為要不停打起啲空氣入去，咁焗起嚟就會脹卜卜。當你見到舊麵糰喺焗爐度隨隨發脹，心情真係好鬼興奮，我鍾意整到細細粒bite size，超可愛！餡料可以用果醬，吉士醬，雪糕仲正！不過用雪糕做餡就要快啲食，雪糕好快溶。


水 60g
牛奶 60g
無鹽牛油 60g
低筋麵粉 120g
雞蛋 2只
鹽 少許

1. 焗爐預熱200度。
2. 麵粉同鹽過篩備用。
3. 牛油，水同牛奶放煲中煮開，一見到滚就即刻放麵粉落去用木杓不停地攪，直至攪成一個麵糰。
4. 離火，繼續不停地攪2至3分鐘直到唔黐煲為止。
5. 略為冷却一陣就加入蛋，要逐只放，每放一只蛋之後要不停地攪匀，放嗮蛋之後繼續拌匀至麵糰順滑同有光澤就得啦。
6. 牛油纸舗焗盆。
7. 用唧袋或者用匙羹將麵糰分成喜愛既大小置於焗盆，麵糰之間要距離大概2吋，否則焗起嚟會發大同黐埋。
8. 焗20分鐘就攞出嚟攤凍。
9. 可以喺中間切開，搽上喜愛饀料。又或者將饀料放入唧袋，喺底部唧入去都得。

* 吉士醬可參考士多啤梨拿破侖食譜: http://wahlaikitchen.blogspot.hk/2013/04/blog-post_27.html

士多啤梨拿破侖

見到就好開心，但係食得唔安心，因為唔知點食，切開又唔係，因為一切就散，挈大個口嚟食又失儀態，諗住買番屋企吃，點知番到屋企又淋嗮，激死！
偏偏又鬼咁鍾意吃，唯有動手DIY啦!


材料:

急凍酥皮   一塊
士多啤梨/藍莓   適量
糖粉   適量


吉士醬材料:

蛋黄   3只
沙糖   50g
麵粉   20g
粟粉   20g
牛奶   300g
雲呢拿油   1茶匙
鹽   1/4茶匙



吉士醬做法:

1.  蛋黄，沙糖，鹽，麵粉同粟粉拌匀。

2.  牛奶用中火煮至煲邊起泡，離火。
3.  慢慢倒進蛋液，要不停地搞如果唔係會變咗蛋花。
4.  跟住隔篩倒番落煲度用中火邊煮邊搞至杰身。
5.  倒進碗中，加入雲呢拿油搞匀。

6.  用保鲜紙貼住吉士醬嚟包，放入雪櫃雪過夜。




焗爐預熱200度：

1.  急凍酥皮略為解凍，界開九塊。
2.  用叉喺酥皮面拮幾個窿透氣。
3.  放入焗爐焗15分鐘，放凉。
4.  吉士醬放入唧袋，士多啤梨及藍莓切好。
5.  吉士醬唧喺第一塊酥皮上，排上士多啤梨，放第二塊酥皮，唧上吉士醬及排上士多啤梨，再放上第三塊酥皮，用士多啤梨及藍莓娤飾，撒上糖粉，食得！

炒牛河

喺出面食牛河總係好肥膩，食完飲番幾杯普洱茶都唔掂，自己炒係就係冇咁有鑊氣，但就可以控制油既份量，健康小小咁啦！
小小貼士： 但凡炒河粉，米粉同麵，最好用筷子嚟炒，如果用鑊剷炒，一定會炒到啲粉麵爛嗮，除非落好多油啦，但係我地要食得健康嘛！



材料:

河粉     一斤
牛肉     半斤
銀芽     半斤
蒜頭     两粒
洋葱     1個
油     2湯匙


牛肉醃料:

生抽     2湯匙
老抽     1茶匙
糖    1湯匙
油     2湯匙
胡椒粉     半茶匙
生粉     1茶匙
酒     1茶匙


豉油汁:

生抽     2湯匙
老抽     1茶匙
蠔油     1湯匙
糖    1湯匙



1.  河粉要逐條撕開，不能偷懶。
2.  燒熱鑊，落1湯匙油，下蒜頭，洋葱，兜炒一陣拎走蒜頭，因為凈要個味。
3.  再落埋1湯匙油，放牛肉炒至差唔多熟就落河粉兜匀，跟住落豉油汁拌匀，再落埋銀芽兜匀就可以上碟啦。

Mango Tree

 星期日女人聚會要揾個地方可以坐得耐唔使比人趕，環境舒服得嚟啲嘢又要好食真頭痛！好在我冰雪聰明突然間醒起最近Elements開咗幾間新餐廳，一於試吓新嘢先！最後揀咗食泰國菜 - 純粹係情意結，因為喺曼谷曾經光顧過，有啲信心。

不過間餐廳位置比較隱蔽，港鐡站出嚟行到脚仔軟，要問實Q先知喺邊。諗住星期日食晏梗係訂定位好啲啦，點知去到靜英英，仲以為佢未開添，門口姐姐帶我地行入去，原來餐廳都幾大，一大片落地玻璃，已經有幾檯客坐咗喺度，我地都坐到window seat，好正！

呢盞樹燈好鬼搶眼!



好清新嘅荔枝Mojito - 非常泰feel!



香葉雞 - 保持番水凖


咖哩荔枝鴨 - 咖哩香濃，撈白飯一流！



最正係呢個芒果蟹肉炒飯 - 爆Like!


馬拉盞通菜 - 其實係好食不過我覺得辣，所以唔係食得好多


幾個女人由12點坐到4點幾，完全冇人干擾，亦唔會逼你再叫嘢食，服務態度非常好，不停幫我地加水 - 讚！

南乳燒雞

而家新鲜雞咁鬼貴，唔捨得用嚟燒焗 (係呀，巧cheap呀！)，所以今次用咗冰鲜雞，都唔錯吖！

冰鲜雞 一隻
鹽 1茶匙


醃料：

南乳 2塊
豉油 1茶匙
紹酒 2湯匙
糖 半茶匙
薑蓉 1茶匙

1. 雞洗淨抹乾裏裏外外，再風乾。
2. 用鹽搽匀成隻雞（裏裏外外），醃料撈匀，然後塗匀成隻雞（都係裏裏外外），放入雪櫃醃過夜。
3. 焗爐預熱200度，焗盆舖錫紙，蒸架擺中間，最好抹啲油，咁樣雞皮就唔會黐住。
4. 放隻雞上蒸架，雞胸向上，焗20分鐘，反轉再焗20分鐘至金黄色。
5. 切件上碟。



Carbonara

天氣好厭悶，唔想出街但個肚又唔爭氣喺度嘈嘈閉，點算好？週圍摷吓睇吓有乜嘢可以充饑，哈哈.....竟然比我揾到一包意粉同埋唔知幾時食剩嘅幾片煙肉，得咗！

一人前份量：

意粉     半包
煙肉     2片
淡忌亷     120g
車打芝士（磨碎）     2湯匙
橄欖油     1茶匙
蒜頭     1粒
蛋黄     1隻
鹽 / 黑椒粉     適量

1. 煲滚半煲水，落油同鹽，跟住放意粉煮7分鐘左右（包裝紙有冩），千祈唔好過冷河，會冲走嗮啲味！
2. 煙肉切幼條，放平底鑊用中慢火乾煎，落埋蒜頭煎大約15分鐘至煙肉金黄色，撈起煙肉，蒜頭唔要因為淨係想要個味。
3. 將意粉倒落煙肉油中略炒一下，跟住快手落忌亷同芝士，兜匀後熄火，拿拿臨落埋隻蛋黄，用摩打手極速撈匀，如果唔係隻蛋黄熟咗就唔靚仔架啦！
4. 上碟後撒上煙肉，鹽 / 黑椒粉 - 快靚正！

Financier

好鍾意覆盆子，比人一種高貴嘅感覺，甜品加一粒上去，即時升呢收多廿蚊！
呢個做法有啲似Madeleine，都係最好隔過夜先好拎去焗。

 



麵粉（過篩） 30g
杏仁粉 20g
糖粉 50g
鹽 1/4茶匙
無鹽牛油 50g
蛋白 3隻
雲呢拿油 半茶匙
覆盆子 適量

1. 焗爐預熱200度。
2. 杏仁粉舖喺锡紙上，焗3分鐘。
3. 焗模抹油，放入冰格。
4. 蛋白略略打至起泡。
5. 麵粉，杏仁粉，糖粉同鹽撈匀，加入溶咗嘅牛油搞匀，跟住用fold in方式加進蛋白及雲呢拿油（可放入雪櫃過夜）。
6. 麵糊注入焗模焗两分鐘左右，快手放進覆盆子，一定要快，趁未焗熟就要放，如果面頭熟咗就會擺唔到，跟住焗多5至7分鐘就得啦。

其實可以放埋覆盆子一齊焗，不過覆盆子熟咗啲汁會染紅咗個餅冇咁靚，所以我唔咁早放，都係個人喜好！